Инсультпен ауыратын 76 жастағы науқасқа бірегей ота жасалды

Жетісу облысында міндетті әлеуметтік медициналық сақтандыру шеңберінде инсультті емдеуде алғаш рет инновациялық тәсіл қолданылды.

Талдықорған қаласының облыстық ауруханасының дәрігерлері сол жақ ортаңғы ми артериясы бассейнінде жіті ишемиялық инсультпен ауыратын науқасқа бірегей операция жасады. Өңірде алғаш рет қолданылатын емдеу әдісі «стент-ретривердің көмегімен механикалық рентгенэндоваскулярлық тромбоэкстракция» деп аталады. Ол мидың бітелген тамырынан тромбты механикалық түрде алып тастауға мүмкіндік беретін арнайы медициналық құралды – стент-ретриверді қолдануға негізделген. Процедура рентгендік бақылау арқылы жүзеге асырылады, бұл дәл және қауіпсіз араласуды қамтамасыз етеді.
Нейрохирург дәрігер Айрат Жүнісовтың айтуынша, бұл әдістің бірегейлігі оның минималды инвазивті сипаты мен жоғары тиімділігінде.
«Процедура барысында біз мидың бітеліп қалған тамырына стент-ретриверді енгіземіз, ол тромбты ұстап, оны алып тастайды, қалыпты қан айналымын қалпына келтіреді және мидың зақымдануын болдырмайды. Бұл әдіс қан ағымын тез және тиімді қалпына келтіруге мүмкіндік береді, бұл инсульттің әсерін айтарлықтай азайтады және науқастың денсаулық жағдайын жақсартады. Операция үш сағатқа созылды, науқас нейрохирургия бөліміне ауыстырылды», – дейді Айрат Жүнісов.
Дәрігер атап өткендей, бұл операцияны инсульт басталғаннан кейінгі алғашқы 6 сағатта ғана жасауға болады, сондықтан ауруханаға уақтылы бару және инсультті ерте анықтау өте маңызды.
Әлеуметтік медициналық сақтандыру аясында инсультті емдеу әдістерінің қарқынды дамуы байқалады. Табысты іске асырудың негізгі аспектілерінің бірі — оның қол жетімділігі. Инсультпен ауыратын науқастар сапалы емделуге және қосымша қаржылық шығындарсыз қалпына келу мүмкіндігіне қол жеткізе алады.

«АЛАТАУ-АҚПАРАТ»