Әлемнің жетекші университеттерінің студенттері атанды

Талдықорған қаласындағы Назарбаев Зияткерлік мектебінің түлектері еліміздің және әлемнің жетекші университеттерінің студенттері атанды.

12-сынып оқушысы Жазира Ысқақова Пенсильвания штатындағы Хаверфорд колледжінің жетекші жеке гуманитарлық колледжінің толық грантына ие болды. Жазира химияны тереңдетіп оқуды жоспарлап отыр. Химия пәнінен республикалық және халықаралық олимпиадалардың бірнеше дүркін жеңімпазы. Жарқын жеңістердің қатарында: Вернадский байқауының жеңімпазы, жасанды интеллект және биоинформатика бойынша Бүкілресейлік хакатон.

Ал Амир Қазбек пен  Эмина Жұмағазы Токио халықаралық университетінен шақырту алды.

Амир үшін Токиодағы үздік университеттердің біріне түсу кездейсоқ емес, мақсатқа жетуі болып саналады. Оның айтуынша, Жапония әрқашан тек мәдениетімен ғана емес, жоғары технологияларымен де тартымды болып келеді.

– Мен Қазақстан мен Жапония халықтары арасындағы достықтың үлгісі болғым келеді, өйткені  олардан көп нәрсені үйренуге болатынына сенемін  –  дейді Амир.

Амирдің ағылшын тілі мен тіл білімі бойынша республикалық деңгейдегі жүлделері бар. Оның IELTS – 8.0 көрсеткішін құрады.

Эмина Жұмағазы экономика және бизнес саласында білім алуды көздеп отыр. Ол қоғамға қызмет ету үшін бірқатар әлеуметтік жобаларда волонтер болып табылады: жануарларды қорғау бағыты бойынша, эко волонтерлік, ауыл балаларына ағылшын тілін үйрету. Мектептегі үйірмелерге, бизнес жобалар байқауларына да белсене қатысты.

– Жоғары оқу үлгерімі, ағылшын тілін жақсы білу, SAT емтихандарының жоғары нәтижелері, халықаралық және жобалық олимпиадалардағы жүлделер, спорттық жетістіктер  –  грант алудың негізгі критерийі болып табылады, –  дейді Назарбаев зияткерлік мектебінің кәсіби бағдар бойынша кеңесшісі Айгерім Шаймерденова.

«АЛАТАУ – АҚПАРАТ»