40-тан астам елді мекен су тасқыны қаупі бар учаскелерде орналасқан
![](https://alataugazeti.kz/wp-content/uploads/2022/03/40-тан-астам-905x613.jpg)
Алматы облысында қазіргі уақытта 43 елді мекенде су тасқыны қауіпі жоғары. Бұл туралы «Jetisy’ Media» ақпараттық алаңында өткен брифинг барысында белгілі болды.
Облыс бойынша қардың ең жоғары қалыңдығы 55 см-ге дейін Алакөл, Кербұлақ, Райымбек және Кеген аудандарында, ал қалған аумақтарда орта есеппен 5-15 см-ге дейін байқалады.
Төтенше жағдайлардың алдын алу және оларды жою жөніндегі іс-қимылдарға азаматтық қорғаудың мемлекеттік жүйесін жетілдіру, сондай-ақ азаматтық қорғау қызметтерінің басқару органдарын, күштері мен құралдарын көктемгі кезеңге дайындау мақсатында 3-4 наурыз аралығында облыс аумағында «Көктем-2022» Республикалық командалық-штабтық оқу-жаттығуын өткізу жоспарланған.
Алматы облысы ТЖД бастығының орынбасары Игорь Жуковтың айтуынша, практикалық шара аясында барлық жерде су тасқынына қарсы іс-шаралар, соның ішінде арықтарды, каналдарды, су өткізу құрылыстарын, көпірлерді тазалау және дайындау жұмыстары ұйымдастырылған. Сонымен қатар, су тасқыны кезеңіне дайындық бойынша халық арасында алдын алу жұмыстары ұйымдастырылды, бүгінгі күні 7 мыңнан астам адамды қамтитын 146 жиын өткізілді және 3 мыңға жуық жадынама табыс етілді.
«АЛАТАУ-АҚПАРАТ»