КОНСТИТУЦИЯНЫҢ 30 ЖЫЛДЫҒЫ АТАЛЫП ӨТУДЕ

Қазақстан Республикасының Конституциясына биыл 30 жыл. Ел тәуелсіздігінің негізін қалаған Ата Заң – құқықтық мемлекет пен демократиялық қоғамның берік тірегі. Осы айтулы мерекеге орай Жетісу облысында елдік мәні зор, мазмұны терең іс-шаралар ұйымдастырылып, халықтың құқықтық мәдениетін көтеруге бағытталған жұмыстар жүйелі түрде жүргізілуде.

Облыс орталығы Талдықорғанда Конституция күніне орай бірқатар мазмұнды шаралар өтті. Оқушылар арасында мини-футбол турнирі ұйымдастырылып, қалалық кітапханаларда «Конституция – халықтың төлқұжаты», «Вершина чести – Конституция» секілді ақпараттық сағаттар өтті.
Жастар ресурстық орталығында «Конституциялық IQ» атты интеллектуалды ойын мен «Ашық микрофон» акциялары өткізілуде. Сонымен қатар, Еркін ауылында спорттық жарыстар өтіп, салауатты өмір салты кеңінен насихатталды. Ең үлкен жиын 30 тамыз күні «Жастар» саябағында өтпек. Онда үш мыңға жуық тұрғын қатысады деп күтілуде дегенді айтады облыс басшысы.
Текелі қаласы бойынша 25–29 тамыз аралығында құқық саласының мамандары мен қоғам өкілдері «Диалог о правах» атты ашық кездесулер өткізіп, тұрғындардың құқықтық сауатын арттырды. Сонымен қатар, қалада марафон ұйымдастырылып, жастар салауатты өмір салтына үн қосты.
Қос қаладағы шаралардан бөлек Жетісу өңірінің барлық аудандарында Ата Заңды насихаттау мақсатында қоныс тойлар мен құқықтық кештер, өнер мен ой тоғысқан рухани, мәдени, спорттық жиындар көптеп өткізілді.
Оның қатарында Кербұлақ ауданы бойынша дүйім елді қуантатын жаңалықтың бірі – Сарыөзек ауылында Конституция күніне орай 60 пәтерлі жаңа тұрғын үй пайдалануға берілмек. Бұл – елдің әлеуметтік саясатының жарқын көрінісі. Сонымен қатар, ауданның ауылдық кітапханаларында «Ата Заң – елдігімнің тұғыры», «Құқықтық сауаттылық – заман талабы» сынды тәрбиелік мәні жоғары шаралар өтіп, жұртшылықтың Ата Заңға деген құрметін тереңдете түсті.
Ескелді ауданына қарасты Қарабұлақ ауылында да дөңгелек үстел мен тарихи сағаттар ұйымдастырылып, Конституцияның ел дамуындағы орны жан-жақты талқыланды. Спорттық жиындар өткізілді. Аудандық мәдениет үйінде «Ата заңым – айбыным» атты кең көлемді салтанатты жиын да ауыл тұрғындарына мерекелік көңіл-күй сыйлады.
Ал Көксу ауданының Балпық би, Мұқыры, Айнабұлақ сынды т.б. ауылдарында мерекелік концерттермен қатар, «Ата Заң – Тәуелсіздіктің тұғыры», «Заңды білу – заман талабы» секілді дөңгелек үстелдер ұйымдастырылды. Жиындарға жергілікті өнер ұжымдары мен оқушылар белсене қатысып, халыққа рухани серпіліс сыйлады. Жастардың таным көкжиегін кеңейтті.
Сарқан ауданында патриоттық акциялар, семинарлар, ардагерлермен кездесулер, кітап көрмелері өтті. «Жастар – Отанға!» акциясы арқылы жастар елге деген сүйіспеншіліктерін паш етуде. Мерекелік концерттер де жоғары деңгейде ұйымдастырылды.
Оған көрші орналасқан, Ақсуда да кітапханалар мен мәдениет үйлерінде патриоттық кештер, тарихи-танымдық сағаттар және әдеби-тарихи круиздер жүргізілді. Жансүгіров, Матай, Қызылағаш ауылдарында Конституция туралы бейнероликтер көрсетіліп, жастар арасында блиц-сауалнамалар жасалды.
Қаратал ауданы бойынша өткізілген спорттық велошеру тұрғындардың белсенділігін арттырса, мектеп оқушылары арасында «Ата Заң – Тәуелсіздік тірегі» атты эссе байқауы ұйымдастырылып, жас буынның ой еркіндігін оятты.
Алакөл ауданына қарасты Үшарал қаласы мен Лепсі ауылында өткен құқықтық кездесулер, мәдени жиындар Конституцияның қоғамдағы маңызын кеңінен түсіндіруге бағытталды. Аудан тұрғындары тарихи мұраға құрметпен қарап, өз құқықтарын терең түсінуге мүмкіндік алды дегенді де айта кетті аудан басшылары.

P.S Жалпы, Жетісу өңірінде өткізілген бұл игі шаралар – Ата Заңға деген халықтың құрметі мен сенімінің айғағы десек болады. Олардың әрқайсысы заң үстемдігін, ұлттық бірлікті және азаматтық жауапкершілікті нығайтуға бағытталған. Ауқымды жиындар тек мерекелік сипаттағы іс-шаралар емес, ел болашағына салынған сенімді іргетас десек артық айтқан болмаспыз. Ата Заңымыздың 30 жылдық төл мерекесі құтты болсын, оқырман!

Гүлнұр БАЙМҰХАН