НҰРҒИСА ТІЛЕНДИЕВКЕ 100 ЖЫЛ

Талдықорған қаласындағы Нұрғиса Тілендиев атындағы музыка мектебінің алдында қазақ музыкасының сайыпқыраны, әйгілі күйші, композитор, дирижер Нұрғиса Тілендиевтің 100 жылдығына арналған мерейтойлық іс-шара өтті.

Шара барысында жиналғандар Нұрғиса Тілендиевтің ескерткішіне тағзым етіп, гүл шоқтарын қойды. Одан кейін Жетісу облысы әкімінің орынбасары Диас Есдәулетов сөз сөйлеп, композитордың қазақ музыкасына қосқан өлшеусіз үлесі туралы атап өтті.
Ескерткіштің маңында Талдықорған балалар көркем сурет мектебі оқушыларының сурет салу пленэрі ұйымдастырылып, жас суретшілер дәулескер күйші-композитордың бейнесін қағаз бетіне түсірді. Сонымен қатар Жетісу облысының Дәнеш Рақышев атындағы филармониясының «Жетісу виртуозы» ансамблі шағын концерт қойып, Н.Тілендиевтің «Ата толғауы» күйі, «Құстар» әні және «Ақшағала» әндері шығармаларын орындады.
Бұл мерейтойлық шара ұлы композитордың мәңгілік мұрасын ұлықтап, оның өнерін кейінгі ұрпаққа насихаттау мақсатында ұйымдастырылды.

Зарина БЫЖЫБЕК