ЕГІС НАУҚАНЫ БАСТАЛУДА

Көктемгі дала жұмыстарына дайындық бойынша Журналистер үйінде баспасөз отырысы өтті. Спикер ретінде Жетісу облысы ауыл шаруашылығы басқармасы басшысының орынбасары Шампиков Бахтияр Қалдыбатырұлы көктемгі дала жұмыстары барлық аудан мен қалаларда басталғаны туралы баяндама жасады.

2025 жылы ауыл шаруашылығы дақылдарының егіс көлемі 510,7 мың гектарды құрайды, оның 373,8 мың гектары көктемде себіледі. Көктемгі егіс науқанының жоспарына сәйкес, әр аудандағы атқарылып жатқан жұмыстарға тоқталған Бахтияр Шампиков:
– Ескелді ауданында 44 га масақты дәнді дақылдар себілді. Көксу қант зауытына 3080 себу бірлігі (2,3 мың га) шетелден жеткізілді — 2 500 себу бірлік (1 923 га). Германия (КВС) және 2024 жылдан қалғаны — 580 себу бірлік (446 га), ал Франция (Флоримон Депрес) тұқымының 2000 себу бірлігі (1538 га) 24 наурыз күні Алматы қаласының әуежайына келді. Сонымен қатар, шаруалар өз қаражаты есебінен басқа тұқым жеткізушілерден (Алем Агро, Экспланта) 3,9 мың себу бірлігін (2876 га) сатып алады. Наурыз айына қарастырылған 960 тонна дизель отынының 660 тоннасы жеткізілді, 300 тоннасы бір-екі күнде жеткізіледі, — дейді.
Көктемгі егіс және орақ науқанына қолдау ретінде Аграрлық несие корпорациясы арқылы жалпы 14,3 млрд. теңге несие бөлініпті. Оның 1,3 млрд. теңгесі — «Кең Дала-1», 13 млрд. теңгесі — «Кең Дала-2» бағдарламаларына қарастырылды. Қазіргі уақытта оның 3,7 млрд. теңгесі игерілген («Кең Дала-1» — 1,4 млрд. теңге, «Кең Дала-2» — 2,3 млрд. теңге).
Бүгінгі күнге дейін 195 шаруашылықтан 4,8 млрд. теңгеге өтінім қабылданып, 106 шаруашылыққа 3 млрд. теңге көлемінде несие берілді. Көктемгі дала жұмыстары белгіленген жоспарға сай қарқынды жүріп жатыр, әрі олардың орындалуы үнемі назарда болады дейді шаруашылық басқармасы басшысының орынбасары.

Айгерім ШЫҢҒЫСОВА