«ЖАЙЛЫ МЕКТЕП» ЖОБАСЫ АЛАКӨЛДЕ ІСКЕ АСУДА

Мемлекет басшысы Қасым-Жомарт Тоқаевтың тапсырмасына сәйкес елімізде «Жайлы мектеп» ұлттық жобасы жүзеге асырылуда. Бұл бастама оқу орындарының тапшылығын жою, апатты және үш ауысымды мектептер мәселесін шешу мақсатында қолға алынған.

Аталған жобаның үйлестірушісі – Samruk-Kazyna Construction компаниясы. Қазіргі таңда еліміздің барлық өңірінде заманауи, кең әрі ыңғайлы мектептердің құрылысы қарқынды жүріп жатыр.
Алакөл ауданының білім саласына да ерекше көңіл бөлінуде. Атап айтқанда, Үшарал қаласы мен Достық ауылында әрқайсысы 600 орындық жаңа мектептердің құрылысы жоспарланған. Бұл оқу орындары балалардың сапалы білім алуына қолайлы жағдай жасап, аудандағы білім беру инфрақұрылымын жақсартуға септігін тигізбек.
Бүгінде, шекаралы аймақ саналатын Достық ауылында мектеп құрылысы басталып, белсенді түрде жүргізілуде. Жаңа білім ордасы заманауи құрал-жабдықтармен қамтылып, оқушыларға қолайлы орта қалыптастыруға бағытталған. 2024 жылдың сәуір айында басталған жаңа мектептің құрылысы 600 оқушыға арналған. Қазіргі уақытта құрылыс жұмыстары аяқталуға жақын, нысан жыл соңына дейін пайдалануға беріледі.
«Жайлы мектеп» ұлттық жобасы аясында салынып жатқан бұл жаңа нысандар болашақ ұрпақтың сапалы білім алуына мүмкіндік беріп қана қоймай, өңірдің әлеуметтік-экономикалық дамуына да оң әсерін тигізеді.

Назерке НАБИКЕНОВА
Алакөл ауданы