Ұлттың қуаты – адами капиталда, білімді ұрпақта

Мемлекет басшысы Қасым-Жомарт Кемелұлы Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауы — еліміздің ертеңгі жасампаз жолын айқындаған, ұлт рухын асқақтатқан тарихи құжат болды. Бұл Жолдау — тек экономикалық бағдарлама ғана емес, әрбір азаматтың жүрегіне сенім ұялатып, елдік мақсаттар төңірегіне жұмылдыратын жасампаздықтың жаңа парағы. Осы бір сындарлы шақта Мемлекет басшысының стратегиялық бастамаларын Ескелді ауданының қалың жұртшылығы мен жергілікті атқарушы билігі зор тебіреніспен және толықтай қолдайды.

Президентіміз алдағы кезеңді «Жалпыхалықтық ауқымды құрылыс жылы» деп жариялай отырып, елдің инженерлік және көлік инфрақұрылымын жаңғыртуды басты міндет етіп қойды. Бұл қадам құт қонған Ескелді өңірі үшін де дамудың жаңа көкжиегін ашпақ. Жолдаудан туындайтын міндеттер аясында ауданымыздың әрбір ауылына таза ауыз су жеткізу, жолдарды жаңартып, көлік қатынасын жақсарту және заманауи әлеуметтік нысандар тұрғызу жұмыстары жаңа серпінмен, зор жауапкершілікпен жүргізіледі.
Ұлттың қуаты — адами капиталда, білімді ұрпақта. Жолдауда білім беру саласын дамыту, ардақты ұстаздар қауымына қолдау көрсету және әлеуметтік әділдікті орнату мәселелеріне ерекше басымдық берілді. Біз ауданымызда заманауи мектептердің бой көтеруіне, жас ұрпақтың сапалы білім мен саналы тәрбие алуына барлық жағдайды жасаймыз. Мемлекеттік қамқорлықтың әрбір мұқтаж жанға әділ әрі ашық жетуін қамтамасыз ету — біздің басты парызымыз.
Мемлекет басшысы белгілеп берген асқақ міндеттерді орындау елдігіміздің сыны, бірлігіміздің белгісі. Қасиетті Ескелді жерінің еңбекқор халықымен бірлесе отырып, ауданымыздың әл-ауқатын арттыру жолында аянбай еңбек етеміз. Мақсатымыз бір, мүддеміз ортақ — қуатты мемлекет, гүлденген өлке және бақытты қоғам құру жолында қадамымыз нық, болашағымыз жарқын болғай!

Жанар Байұзақова,
Ескелді ауданы әкімінің орынбасары